التجارة | الثراء

بسم الله والحمد لله والصلاة والسلام علي رسول الله صلي الله علية وسلم ، اللهم خذنا إليك منا وارزقنا الفناء عنا واكشف لنا عن كل سر مكتوم يا حي يا قيوم 

كنوز العبادات ( صدق النية )

يلا نبدأ مع بعض التجارة المربحة والكنوز اللي هتصنع من كل واحد فينا إنسان ثري ، ثري روحانيا ، ثري فكريا ، ثري الميزان إذا لقي رب العالمين يوم القيامة ، ثري أخلاقيا وهو بيتعامل مع الخلق .

كنوز هندخل فيها عالم العبادات ، وعالم الأخلاق ، وعالم الأفكار  ، وعالم الأمثال ، وعالم الكتب اللي فيها عقول أصحابها عشان نغتنم كنوز تبقي سر سعادتنا في الدنيا وزادنا ليوم معادنا عندما نقوم بين يدي رب العالمين .

ويلا مع بعض نبدأ التجارة المربحة و العطايا الربانية المادية والعنوية في الدنيا وفي الأخرة واللي ربنا هيهاديك بيها إذا قمت بهذه العبادة .

هذه العبادة هي أم العبادات ، وهي العبادة اللي بيها تثقل العبادات في الميزان  أو تبقي خفيفة ، هذه العبادة لو دخلت علي أي عبادة ربنا يقبلها ومن غيرها نخاف من عدم قبول العبادات .

هذه العبادة لا تحتاج لأي عبادة وكل العبادات تحتاج هذة العبادة ، عبادة اسمها ( صدق النية ) ، والنية هي الباعث و الدافع اللي بيحركني لأي تصرف ، النية دي أنت تعرفها والله سبحانة وتعالي ناظر اليها ، بل النية دي هي اول شئ ربنا ينظر له لما تقوم تعمل أي حاجة .

وقال صلي الله علية وسلم ( إن الله لا ينظر الي صوركم ولا الي أجسادكم ولكن ينظر إلي قلوبكم وأعمالكم ) وفي رواية « ينظر إلي نياتكم وأعمالكم » .

لو النية طيبة وصادقة تكبر أوي أنت وعملك عند ربنا سبحانة وتعالي وتاخد كنوز وهذة هي التجارة تجارة مع الله سبحانة وتعالي .

ولكن لازم تعرف لية ربنا بيعظم النية ؟ ولية كل العلماء في كل الكتب بيبدؤا العبادات بباب النية ؛ لأن ربنا عايز قلبك حاضر حاسس باللي انت بتعملة مش بدن جي وبس .

زي مثلا لما تسمع الآذان وتقوم عشان تصلي ( أنت قايم تعمل اية )أنا قايم أحضر بين يدي رب العالمين ، لحظة الحضور دي غالية اوي عند ربنا اسمها « النية الصادقة الصافية الجميلة » اللي بيقول عليها سيدنا عبدالله بن المبارك ( رُب عملا صغير تُعظمة النية ورُب عملا كبير تُحقرة النية ).

وكنوز النية الصادقة الصافية :

الكنز الأول : النية الصادقة تستجلب العون من ربنا اللي نيتة صافية ربنا بيساعدة

الكنز الثاني : تنقل العادات اليومية لأثقل العبادات في الميزان

سيدنا كعب بن عُجرة بيقول ( انه رأي واحد من الصحابة يمشي وكان جسمة قوي ، فلبصحابة يقولون لو كان هذا يخرج في سبيل الله ) .

فقال صلي الله علية وسلم لو خرج من بيتة يسعي علي أبوين شيخين كبيرين كان في سبيل الله ، ولو خرج علي ولدين صغار ليعفهما كان في سبيل الله ، ولو خرج علي نفسة ليعفها كان في سبيل الله .

سيدنا النبي بيقول دة جهاد بيُقاتل في معركة الحياة ، ولو مات الشخص وهو نازل للعمل يُبعث مع الشهداء.

ولو اتعور كما قال سيدنا محمد ( يأتي الجرح لون الدم والريح ريح المسك ) دة اللى بيُقاتل فى معركة الحياة مش اللى بيُقاتل على الجبهه فقط.

الكنز الثالث : النية الصادقة تعطيك الأجر من غير العمل ، يكفي بس إن انا كان نفسي ومقدرتش ، كان نفسي دي غالية اوي عند ربنا سبحانة وتعالي .

قال صلي الله علية وسلم ( من أتي الي فراشة وهو يريد أن يقوم يصلي فغلبتة عينة كان له اجر ما نوي وكان نومة صدقة علية من ربة ) .

الكنز الرابع : النية الصالحة تُصلح ما أفسدة العمل ؛ فمثلا واحد يعمل حاجة غلط بس كانت نيتة كويسة فربنا ينجية ببركة النية الحلوة.

سيدنا ابراهيم النخع بيقول ( ان الرجل ليتكلم بالكلام السئ لا ينوي بة الا الخير فيلقى الله العذرة فى قلوب الناس فيقولون والله ما اراد الا الخير ).

عشان كدة قبل ما تعمل أي عمل فكر ، احضر بقلبك ، اسأل نفسك انا بعمل العمل دة لية ، لأن النية الصالحة بتستجلب العون من ربنا سبحانة وتعالى .

كنوز المهارات ( الدافع الذاتي )

المهارات هي مجموعة من الأفكار والسلوكيات اللي تقدر تكتسبها ، ولو اكتسبتها تأثيرك في قيادة حياتك بيكون أقوي .

وأي حد يقدر يكتسب المهارات دي لأن سيدنا رسول الله بيقول ( إنما العلم بالتعلم ، وإنما الحلم بالتحلم ) محاولتك لاكتساب اي شئ بعون الله هتقدر علية.

هذة المهارة كنز كبير اوي ، لان كل حاجة في حياتنا واحنا ماشيين بتتغير دوام الحال من المُحال والشخص اللي قادر علي الإنجاز هو شخص عندة دافع ذاتي .

الدافع الذاتي دة طاقة داخلية بتشجعك لوحدك من غير مساعدة حد من غير دعم حد ، طاقة داخلية بتشجعك علي الأستمرار فيما تُريد.

في طلبة مستقبلهم هيضيع لو أهاليهم مصحهومش كل يوم عشان يروحوا المدرسة او الجامعة ، وفي موظفين مستقبلهم هيضيع لو مش كل يوم اللى حواليهم بيشجعوهم عشان يشتغلوا كويس ، وفى ناس مش هتصلى لو مفيش حد بيفكرة بالصلاة.

جميل ان احنا نساعد بعض ، لكم فى مرحلة من مراحل حياتك ممكن متلاقيش حد حواليك بل ممكن اللى حواليك يبقوا ماشيين غلط ، وانت محتاج من جواك صوت داخلى مُحفز ( الدافع الذاتى ) عشان يخليك تكمل سكتك . 

يقول الله تعالى ( يا أيها الذين آمنوا عليكم أنفسكم لا يضركم من ضل إذا اهتديتم إلي الله مرجعكم جميعا فينبئكم بما كنتم تعلمون )

يمكن ناس كتير محرومة من كنز الدافع الذاتي بسبب انه مش فاهم طبيعة الدنيا وطبيعة الناس ، طبيعة الدنيا لو فهمتها صح دوافعك متتكسرش ابدا ، والدنيا مكان للكدح والتعب .

وكل شئ لازم عشان تحصل علية لازم تدفع تمنة انت مش في الجنة ( لهم فيها ما يشتهون )

تتمني طائر يسقط بين يديك مشويا الكلام دة مش موجود في الدنيا .

والدنيا مش سكة عادية كلها مطالع ومنازل ، فلو مش فاهم طبيعة الدنيا دوافعك الذاتية تتكسر ، وهناك نوعين من الناس ، ناس خدت قرار تعيش في الدنيا مُلهمة وقدوة اللي يشوفة يتعلم منة ، وناس تانية كتير خدت قرار تعيش في الدنيا حياة اللامهتم - الساخر اللي بيعيش حياة عادية كدة وخلاص هيمشي ، فأنت لازم تفهم إن طبيعة الناس مش كلهم مُلهمين ، فمش كل واحد غير مهتم بالحياة ساخر من المتفوقين والمجتهدين يقوم يكسر الدافع الذاتي اللي فيك .

عشان كدة بن الجوزي بيقولك ( لا تغتر بقلة السالكين وكثرة الهالكين ) .

يساعدك علي اكتساب الدافع الذاتي 

- لا تسئ الظن بنفسك ، متقعدش تقول ربنا خلقني لية انا مبعرفش اعمل حاجة ، مينفعش ربنا مبيعملش شئ عبثي ، وإنما كل شئ خلقه الله له قيمة ، فلو أحسنت الظن بنفسك دافعك الذاتي هيتكون 

-استجب للرسائل الربانية ، وانت ماشي في رحلة حياتك هتجيلك دفعات من ربنا امشي في السكة دي واجتهد 

سيدنا خالد بن الوليد لما اخوة الوليد بن الوليد أسلم وراح لسيدنا محمد 

قال لة الرسول : أين خالد 

فرد علية الوليد قائلا : لم يعلن اسلامة حتي الآن 

فقال الرسول : كنت أظن أن عقلة لن يسلمة إلا لكل خير وسيدلة علي الأسلام

فكتب الوليد هذا الكلام في ورقة وأرسلها الي أخية خالد بن الوليد ، وعندما وصلت الرسالة لة كان سيدنا خالد بن الوليد رأي مناما انة كان في مكان ضيق وبعدها بقي في مكان واسع ففهم سيدنا خالد ان هناك فتح قادم ، وعندما جإتة الرسالة جهز الجمل الخاص بة بالطعام والشراب وأيضا قابل سيدنا عمر بن العاص في الطريق وذهبوا الي النبي

وكل دة بالدافع الذاتي اللي جوة سيدنا خالد عندما استجاب لرسالة ربنا 

 والحمد لله رب العالمين